तिसरं पर्व... मराठी संगीताच्या समृद्ध परंपरेचा, विविधतेचा आणि नव्या सृजनशीलतेचा महोत्सव!
 

२०२५ साली एका आगळ्यावेगळ्या संकल्पनेतून सुरू झालेला मराठी इंडी म्युझिक अवॉर्ड्स (मीमा) हा प्रवास आता तिसऱ्या पर्वात पदार्पण करत आहे!

मराठी संगीताचा समृद्ध वारसा जपताना, स्वतंत्र संगीतनिर्मितीला प्रोत्साहन देण्यासाठी आणि महाराष्ट्राच्या कानाकोपऱ्यातील संगीताला एक हक्काचं व्यासपीठ मिळवून देण्यासाठी सुरू झालेल्या या उपक्रमाने गेल्या दोन पर्वांत अनेक कलाकारांना एकत्र आणलं. प्रस्थापित कलाकारांच्या योगदानाचा गौरव करताना, नव्या पिढीतील प्रतिभावान संगीतकार, गीतकार आणि गायकांना प्रोत्साहन देण्याचा यशस्वी प्रयत्न केला.
 

आणि आता... याच सांगीतिक प्रवासाचं तिसरं पर्व घेऊन येत आहोत — मराठी इंडी म्युझिक अवॉर्ड्स २०२७!

​

महाराष्ट्राची खरी ओळख त्याच्या सांस्कृतिक विविधतेत दडलेली आहे. खानदेशी, अहिराणी, आगरी, कोळी, कोकणी, मालवणी अशा विविध प्रादेशिक बोलींमधून फुलणारं संगीत असो, किंवा भावगीत, भक्तिगीत, लोकगीत, शास्त्रीय, उपशास्त्रीय आणि आधुनिक पॉप संगीतासारख्या विविध शैलींमधून व्यक्त होणारी सर्जनशीलता असो — प्रत्येक सुराला स्वतःची ओळख आहे, प्रत्येक गीतामागे एक गोष्ट आहे आणि प्रत्येक कलाकाराच्या कलेमागे असंख्य स्वप्नं आहेत!

चित्रपटसंगीताच्या पलीकडेही मराठी संगीताचं एक विशाल आणि समृद्ध विश्व आहे. या स्वतंत्र, चित्रपटबाह्य संगीतविश्वातील अनेक उत्तमोत्तम कलाकृती आणि त्यांचे निर्माते अनेकदा अपेक्षित प्रसिद्धी व सन्मानापासून दूर राहतात.

याच कलाकारांच्या कर्तृत्वाला योग्य दाद मिळावी, त्यांच्या संगीताला नवी ओळख मिळावी आणि त्यांच्या प्रतिभेचा यथोचित गौरव व्हावा, या उद्देशाने 'मीमा'ची सुरुवात झाली.

​

मीमा हा केवळ पुरस्कार सोहळा नाही, तर मराठी संगीताच्या वैविध्याचा उत्सव आहे. परंपरा आणि आधुनिकता यांना जोडणारा, अनुभवी आणि नवोदित कलाकारांना एकत्र आणणारा, नवनवीन सांगीतिक प्रयोगांना प्रोत्साहन देणारा आणि मराठी स्वतंत्र संगीताला राष्ट्रीय व जागतिक स्तरावर पोहोचवण्याचं स्वप्न बाळगणारा हा एक सांगीतिक उपक्रम आहे.

​

२०२७ च्या तिसऱ्या पर्वातही याच ध्येयाने, नव्या उत्साहाने आणि अधिक व्यापक दृष्टिकोनातून आम्ही पुढे जात आहोत. कारण आमच्यासाठी प्रत्येक सूर महत्त्वाचा आहे, प्रत्येक कलाकार महत्त्वाचा आहे आणि प्रत्येक अस्सल सांगीतिक अभिव्यक्ती सन्मानास पात्र आहे!

​

चला तर मग...

मराठी संगीताचा समृद्ध वारसा जपूया, नव्या सर्जनशीलतेचं स्वागत करूया आणि प्रस्थापित व नवोदित कलाकारांच्या कलाकृतींचा एकत्रित गौरव करूया!

​

मराठी इंडी म्युझिक अवॉर्ड्स २०२७ — तिसरं पर्व!

पुन्हा जल्लोष मराठी संगीताचा !